ການສຳຫຼວດເງິນເດືອນແມ່ນຫຍັງ?

ການສຳຫຼວດເງິນເດືອນແມ່ນເປັນເຄື່ອງມືທີ່ນຳໃຊ້ໃນການປຽບທຽບການຈ່າຍເງິນເດືອນໃຫ້ພະນັກງານ ແລະ ເປັນມາດຕະຖານໃນການປຽບທຽບວ່າ ບໍລິສັດ/ອົງກອນຂອງເຮົາຈ່າຍເງິນເດືອນໃຫ້ພະນັກງານເໝາະສົມແລ້ວ ຫຼື ບໍ ເມື່ອທຽບກັບບໍລິສັດ/ອົງກອນອື່ນໆໃນຂົງເຂດດຽວກັນ

ຄວາມສຳຄັນຂອງການສຳຫຼວດເງິນເດືອນ

ການສຳຫຼວດເງິນເດືອນແມ່ນມີຄວາມສຳຄັນ ໃນການປະເມີນຄ່າຈ້າງຂອງພະນັກງານ, ເປັນປະໂຫຍດໃນການຈ້າງພະນັກງານ , ຮັກສາພະນັກງານຢ່າງຖືກຕ້ອງ ແລະ ມີປະສິດທິພາບ, ຊ່ວຍເຮັດໃຫ້ອັດຕາການລາອອກຂອງພະນັກງານຫຼຸດລົງ, ພະນັກງານເຮັດວຽກຢ່າງມີຄວາມສຸກຫຼາຍຂຶ້ນ ແລະ ສາມາດເຮັດວຽກກັບອົງກອນໄດ້ດົນຂຶ້ນ.

ການສຳຫຼວດເງິນເດືອນຄັ້ງນີ້ແມ່ນເປັນຄັ້ງທີ 3 ທີ່ບໍລິສັດ 108Jobs ແລະ ບໍລິສັດ Wise Research ໄດ້ຈັດຂຶ້ນມາ, ໂດຍມີຈຸດປະສົງເພື່ອລວບລວມຂໍ້ມູນກ່ຽວກັບ ຜົນຕອບແທນ ແລະ ເລື່ອງສະຫວັດດີການໃຫ້ພະນັກງານປະຈຳ ໃນແຕ່ລະອຸດສະຫະກຳວຽກທີ່ແຕກຕ່າງກັນ, ເພື່ອເປັນແນວທາງທີ່ດີໃຫ້ແກ່ບໍລິສັດ ຫຼື ອົງກອນໃນການຕັດສິນໃຈຈ້າງງານພະນັກງານ ແລະ ເປັນປະໂຫຍດຕໍ່ການປັບປຸງລະບົບເງິນເດືອນ ແລະ ສະຫວັດດີການຂອງບໍລິສັດ/ອົງກອນ.